Yangilangan sana: 2013-04-24 Ko`rilgan: 1374

Innovatsiyalar taraqqiyotga xizmat qiladi

      Toshkentda VI Innovatsion g‘oyalar, texnologiyalar va loyihalar respublika yarmarkasi ochildi

      Innovatsiyalar davlatning muhim strategik resurslaridan biridir. Ijtimoiy-iqtisodiy masalalarni muvaffaqiyatli hal etish, yangi sanoat va moliya texnologiyalarini joriy etish, innovatsiya-investitsiya infratuzilmasini rivojlantirish, intellektual salohiyatni saqlash va ko‘paytirish, import o‘rnini bosadigan eksportbop mahsulotlar ishlab chiqarish, valyuta zaxirasini to‘plash ma’lum darajada innovatsiya faoliyati bilan bog‘liqdir.

      Prezidentimiz Islom Karimovning 2006-yil 7-avgustda qabul qilingan “Fan va texnologiyalar rivojlanishini muvofiqlashtirish va boshqarishni takomillashtirish chora-tadbirlari to‘g‘risida”gi, 2008-yil 15-iyulda imzolangan “Innovatsion loyihalar va texnologiyalarni ishlab chiqarishga tatbiq etishni rag‘batlantirish borasidagi qo‘shimcha chora-tadbirlar to‘g‘risida”gi va 2010-yil 15-dekabrdagi “2011-2015-yillarda O‘zbekiston Respublikasi sanoatini rivojlantirishning ustuvor yo‘nalishlari to‘g‘risida”gi qarorlarida belgilangan O‘zbekistonni iqtisodiy rivojlantirish yo‘nalishi innovatsion iqtisodiyotga o‘tishni nazarda tutadi.

      Tadbirning ochilishida O‘zbekiston Respublikasi Fanlar akademiyasi prezidenti Sh.Solihov an’anaviy Innovatsion g‘oyalar, texnologiyalar va loyihalar respublika yarmarkasi g‘oyat muhimligini ta’kidladi. Negaki, u muhim vazifani hal etish – innovatsion taraqqiyot jarayonlarini kuchaytirish uchun sanoatchilar, olimlar va tadbirkorlar sa’y-harakatlarini integratsiyalashtirishga xizmat qilmoqda.

      Avvalgi yarmarkalar natijalari bunga yaqqol misol bo‘la oladi. Ushbu tadbirlarda ikki mingdan ziyod innovatsion g‘oyalar va texnologiyalar namoyish etilib, umumiy qiymati 44,7 milliard so‘mlik 1545 shartnoma imzolangan edi. Natijada 480 milliard so‘mlik tayyor mahsulot ishlab chiqarildi, 19 turdagi yangi mahsulotni yalpi ishlab chiqarish boshlandi, 24 shartnoma doirasida sanoat-tajriba ishlab chiqarishi yo‘lga qo‘yildi.

      “O‘zekspormarkaz”da bu yil oltinchi marta o‘tkazilayotgan yarmarka O‘zbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi, Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qo‘mitasi tomonidan tashkil etildi. Unda vazirliklar, idoralar, banklar, iqtisodiyotimizning barcha tarmoqlari korxonalari, kichik biznes va xususiy tadbirkorlik sub’ektlari, fermer xo‘jaliklari, O‘zbekiston Respublikasi Fanlar akademiyasi institutlari, oliy o‘quv yurtlari, ilmiy markazlar hamda tajriba-konstruktorlik tashkilotlari keng ishtirok etmoqda.

      Ta’kidlash joizki, yarmarkalarda namoyish etish uchun mo‘ljallangan ishlanmalarga nisbatan talablar yildan-yilga kuchaytirilmoqda. Bunda ishlab chiqarishning yuqori texnologiyali sektoriga alohida e’tibor qaratilmoqda. Chunki, hozirgi sharoitda faqat ilmtalab mahsulotlargina bozorlardan mustahkam o‘rin egallashi mumkin. Mamlakatimiz vazirliklari, idoralari va yirik kompaniyalarining yetakchi mutaxassislaridan tarkib topgan ishchi guruhi shunga rioya etgan holda, ilmiy, ta’lim, konstruktorlik tashkilotlari va ixtirochilarning 607 arizasini ko‘rib chiqdi. Ular orasidan sanoat, qishloq xo‘jaligi, tibbiyot, farmakologiya, axborot, ilm-fan va ta’lim sohasini rivojlantirishga doir eng istiqbolli 550 texnologiya, innovatsion g‘oya hamda loyiha tanlab olindi. Ular bilan ko‘rgazma maydonchalaridagi stendlar orqali tanishish mumkin. Masalan, Fanlar akademiyasining Umumiy va noorganik kimyo instituti temir yo‘l lokomotivlari, avtomobil transporti, traktorlar reduktorlari va uglevodorod xomashyosini dastlabki haydashga tayyorlash uchun moylash materiallarini olish texnologiyasi, shuningdek, neft-gaz quduqlarini mustahkamlash uchun og‘irlashtirilgan tamponaj sement hamda loyli burg‘ilash qorishmalar uchun og‘irlashtirgichni, Mikrobiologiya instituti biogaz olish uchun mahalliy metanogen mikroorganizmlarning mahalliy assotsiatsiyasi peparatlari, Qarshi davlat universiteti ko‘kalamzorlashtirish uchun gulli-manzarali o‘simliklarning yangi navlari, Andijon qishloq xo‘jaligi instituti ichki yonish dvigateli havo tozalagichining filtrlovchi qurilmasini namoyish etmoqda.

      Muqobil energiya manbalari, chunonchi, quyosh energiyasida ishlaydigan texnologiyalar yarmarka qatnashchilarida katta qiziqish uyg‘otdi. Bu mamlakatimiz ushbu sohada ulkan salohiyatga ega ekanligi va mazkur ishlar davlatimiz tomonidan qo‘llab-quvvatlanayotgani bilan bog‘liqdir. Bu borada Prezidentimiz Islom Karimovning 2013-yil 1-mart kuni qabul qilingan “Muqobil energiya manbalarini yanada rivojlantirish chora-tadbirlari to‘g‘rsida”gi farmoni va Xalqaro quyosh energiyasi institutini tashkil etishga oid qarori qabul qilindi.

      Masalan, Toshkent arxitektura-qurilish instituti issiq suv ta’minotining quyosh-elektr qurilmasi, Fanlar akademiyasi “Fizika-Quyosh” ilmiy-ishlab chiqarish birlashmasi Fizika-texnika instituti ko‘chma murakkab fotoissiqlik hosil qiluvchi qurilma, elektr hamda issiqlik ta’minotining quyosh va issiqlik muqobil qurilmalari uchun Stirling dvigateli, quyoshdan kam quvvatli zaryadlash qurilmasi, Farg‘ona politexnika instituti maishiy quyosh suv isitgichlari hamda issiq va qaynatilgan suv olish uchun quyosh parabolotsilindrik apparatni taqdim etmoqda.

      Ilm-fan va ishlab chiqarishni chuqur integratsiyalashtirish maqsadida o‘tgan yilgi yarmarka doirasida tashkil etilgan “Texnologiyalar tranfseri” yo‘nalishi kengaytirildi. Bu yerda avvalgi tadbirda taqdim etilgan va bugungi kunda ham iste’molchilar tomonidan katta qiziqish bildirilayotgan 100 ishlanma namoyish etilmoqda.

      – Yarmarkada oltinchi marta ishtirok etmoqdamiz, – deydi Kimyo-farmatsevtika ilmiy-tadqiqot instituti professori, texnika fanlari doktori Mirahmad Yunusov. – Uch yil avval neft-gaz sanoati katalizatorlarini namoyish etgan edik va bugun ular amalda qo‘llanilmoqda. Bu qurilmalar Farg‘ona neftni qayta ishlash zavodida muvaffaqiyatli ishlatilmoqda, turli sanoat reaktorlarida sinovdan o‘tkazilmoqda. Ta’kidlash joizki, ilgari ular chetdan olib kelinardi, bugun esa mamlakatimizda ularni yalpi ishlab chiqarish imkoniyatiga egamiz. Yarmarka bizga ushbu sohada hamkorlikni yo‘lga qo‘yishga yordam beradi, deb ishonaman.

      Shunisi e’tiborliki, bu yilgi yarmarkada yosh olimlarning g‘oya va ishlanmalariga keng o‘rin berilgan. Negaki, ushbu jarayonga yosh avlod vakillarini keng jalb qilish mamlakatimiz innovatsion iqtisodiyoti uchun muhim ahamiyat kasb etadi. Shuning uchun davlatimiz ularni har tomonlama qo‘llab-quvvatlab, mablag‘ ajratmoqda va innovatsiya tadqiqotlarini o‘tkazish uchun sharoit yaratib bermoqda. Buning samarasida ko‘plab iqtidorli yoshlar natijalari katta amaliy ahamiyatga ega va iqtisodiyotning turli tarmoqlarida ishlab chiqarishga joriy etilayotgan tadqiqotlarda qatnashmoqda. Masalan, joriy yilgi yarmarka ekspozitsiyasi 74 nafar yosh olim, talaba va “Kelajak ovozi” respublika tanlovi g‘oliblarining ishlanmalarini o‘z ichiga olgan.

      – Bugun men o‘z loyihamni namoyish etish imkoniyatiga ega bo‘lganimdan g‘oyat xursandman, – deydi Qarshi muhandislik-iqtisodiyot institutining to‘rtinchi bosqich talabasi Sardor Hamroyev. – Ushbu loyiham bilan “Kelajak ovozi – 2012” tanlovida g‘olib bo‘lgan edim. Uning o‘ziga xosligi shundaki, loyihamiz asosida O‘zbekiston janubida quyosh batareyalari, shamol generatorlari, elektr va issiqlik akkumulyatorlari bilan jihozlangan ekologik toza uylarni qurish va bundan katta iqtisodiy samara olish mumkin. Ayni paytda Qashqadaryo viloyatining Nishon tumanida mazkur loyihani hayotga tatbiq etish ustida ish olib bormoqdamiz.

      Mamlakatimiz yirik sanoat ishlab chiqarishlari taqdimotlari bu galgi yarmarkaning o‘ziga xos jihati ekanini qayd etish zarur. “O‘zbekneftgaz” milliy xolding kompaniyasi, “O‘zkimyosanoat”, “O‘zbekenergo” davlat aksiyadorlik kompaniyalari, Olmaliq va Navoiy kon-metallurgiya kombinatlari, “O‘zpaxtasanoat” uyushmasi, “O‘zavtosanoat” aksiyadorlik kompaniyasi singari korxona va tashkilotlar mutaxassislari ishlab chiqarishga innovatsion g‘oyalar, texnologiyalar hamda loyihalarni joriy etish samaradorligi haqida so‘zlab bermoqda.

      Yarmarka davomida innovatsion taraqqiyotning hududiy muammolariga bag‘ishlangan seminar bo‘lib o‘tadi. Viloyatlarning bu boradagi taqdimotlari o‘tkaziladi, joylarda innovatsiyalarni rivojlantirish bilan bog‘liq muhim masalalar muhokama etiladi. Femerlar uchun qishloq xo‘jaligi mahsuldorligini oshirishda foydalanishga mo‘ljallangan yangi texnologiyalar va innovatsiyalar namoyish etiladi.

      Muxtasar aytganda, navbatdagi Innovatsion g‘oyalar, texnologiyalar va loyihalar respublika yarmarkasi ilm-fan va ishlab chiqarishni to‘liq integratsiyalashtirish, mamlakatimizni ijtimoiy-iqtisodiy rivojlantirish bo‘yicha dolzarb muammolarni hal etish uchun ilmiy salohiyatni keng jalb etish imkonini beradi.

      VI Innovatsion g‘oyalar, texnologiyalar va loyihalar respublika yarmarkasining ochilishida O‘zbekiston Respublikasi Bosh vazirining o‘rinbosarlari G‘.Ibragimov, U.Rozuqulov ishtirok etdi.

(UzA)

"O‘qituvchi" nashriyot-matbaa ijodiy uyi ("O‘qituvchi" NMIU) umumta`lim maktablari, oliy o`quv yurtlari, akademik litsey va kasb-hunar kollejlari uchun original, tarjima darsliklar, o`quv qo`llanmalar, shuningdek, o`qituvchilar uchun metodik qo`llanmalar nashr etadi. Buyurtma

Batafsil ma`lumot

Innovatsiyalar taraqqiyotga xizmat qiladi O‘qituvchi NMIU umumta'lim maktablari, oliy o'quv yurtlari, akademik litsey va kasb-hunar kollejlari uchun original, tarjima darsliklar, o'quv qo'llanmalar, shuningdek, o'qituvchilar uchun metodik qo'llanmalar nas

Yangiliklarni o‘qishni tavsiya etamiz

Oqsaroyda qabul

      O‘zbekiston Respublikasi Prezidenti Islom Karimov 18-aprel kuni Oqsaroyda “Zamonaviy uy-joy qurilishi – qishloq joylarini kompleks rivojlantirish va qiyofasini o‘zgartirish hamda aholi hayotining sifatini yaxshilash omili” mavzusidagi xalqaro konferensiyada ishtirok etish uchun mamlakatimizga kelgan Osiyo taraqqiyot banki vitse-prezidenti Shiao Jaoni qabul qildi.

Quvnoq startlar

      Poytaxtimizdagi “Chilonzor” bolalar sport majmuida umumta’lim maktablari o‘quvchilari o‘rtasida “Quvnoq startlar” musobaqasining Toshkent shahar bosqichi bo‘lib o‘tdi.

Mashhur yangiliklar

Войти / Регистрация
Закладки
Корзина покупок
Оформление заказа
Интернет-магазин книги в Ташкенте