Yangilangan sana: 2019-03-15 Ko`rilgan: 204

O`zbekiston Respublikasi Prezidenti Shavkat Mirziyoyevning ko`p tarmoqli Humo arena sport kompleksining tantanali ochilish marosimidagi nutqi

Assalomu alaykum, aziz vatandoshlar!

Hurmatli Xalqaro xokkey federatsiyasi prezidenti Rene Fazel janoblari!

Muhtaram mehmonlar! Xonimlar va janoblar!

Avvalo, sizlarni Navro`z bayrami arafasida, go`zal bahor kunlarida O`zbekiston zaminida samimiy qutlayman. Barchangizga chuqur hurmatim va eng ezgu tilaklarimni bildirishdan benihoya mamnunman.

Bugun poytaxtimiz markazida ishga tushirilayotgan zamonaviy sport koshonasi - "Humo arena"ga tashrif buyurib, quvonchimizga sherik bo`layotganingiz uchun sizlarga katta rahmat!

Ushbu tantanali marosimda ishtirok etayotgan jahon sporti yulduzlari, mashhur madaniyat va san`at arboblari, diplomatlar va xalqaro tashkilotlar vakillari, yetakchi kompaniyalar rahbarlariga qarata aytmoqchiman:

Xush kelibsiz, mehmondo`st O`zbekiston zaminiga!

Aziz do`stlar!

Bugun biz yurtimizda keng ko`lamli islohotlar va jadal o`zgarishlarni amalga oshirmoqdamiz. Va bu yo`lda jismoniy sog`lom va barkamol avlodni voyaga yetkazish bizning ustuvor vazifamiz va biz buning uchun bor kuch va mablag`larimizni safarbar etamiz.

Shu ma`noda, biz jismoniy tarbiya va sportga alohida e`tibor bermoqdamiz.

Bugungi kunda mamlakatimizning barcha hududlarida, hatto eng olis tumanlarda ham zamonaviy va foydalanish uchun qulay sport infratuzilmasi barpo etilmoqda. Keyingi ikki yilda mamlakatimizda sport bilan doimiy shug`ullanadiganlar soni ikki barobar ko`paydi.

Yurtimiz sportchilari turli xalqaro musobaqalarda mingdan ziyod medallarni qo`lga kiritdi, ulardan 400 dan ortig`i oltin medallardir. Hozirgi vaqtda boks, dzyudo, erkin kurash, badiiy gimnastika, shaxmat va boshqa sport turlari bo`yicha O`zbekistonda shakllangan maktablar butun dunyoda ma`lumu mashhurdir.

Mamlakatimizda o`tkazilayotgan nufuzli xalqaro musobaqalar, jumladan, dunyo va qit`a chempionatlari soni yil sayin ortib bormoqda. Biz 2030 yilda O`zbekistonda yozgi Osiyo o`yinlarini o`tkazish tashabbusi bilan chiqdik.

Hurmatli xonimlar va janoblar!

Biz sportchilarimiz qishki sport o`yinlari, jumladan, eng qiziqarli bo`lgan figurali uchish, xokkey, tog`-chang`i sporti, fristayl, snoubord va boshqa sport turlari bo`yicha Vatanimiz sha`nini munosib himoya qilishiga intilmoqdamiz.

O`tgan asrning yetmishinchi yillaridayoq Toshkentda "Yubileyniy" muz sporti saroyi, "Binokor" xokkey jamoasi, Toshkent viloyatida tog`-chang`i trassasi mavjud bo`lgan.

Bizning bu borada erishgan yutuqlarimiz orasida fristayl bo`yicha qishki Olimpiya o`yinlari va jahon chempionatida qo`lga kiritilgan oltin medallar, figurali uchish bo`yicha Osiyo o`yinlari va boshqa xalqaro musobaqalarda erishilgan 70 dan ziyod medallar borligini ta`kidlash lozim.

Biz sport sohasidagi ana shunday shonli an`analarni davom ettirishni o`z burchimiz deb bilamiz.

O`tgan yili mamlakatimizda to`rtta xokkey klubi tashkil etildi. Bu yil fevral oyida shaybali xokkey bo`yicha birinchi bor O`zbekiston chempionati o`tkazildi.

O`zbekiston sportchilari yaqinda Krasnoyarskda o`tkazilgan Butunjahon qishki universiadasida ilk bor ishtirok etdi.

Ushbu zamonaviy muz saroyining ishga tushirilishi O`zbekiston sporti tarixida yangi bosqichni boshlab beradi, desak, o`ylaymanki, mubolag`a bo`lmaydi.

Mazkur inshoot o`zining ilg`or me`moriy va muhandislik-qurilish yechimlari, texnik jihozlanish darajasiga ko`ra noyobdir. Biz hamkorlarimiz - yetakchi kompaniyalarning eng so`nggi ishlanmalarini jalb etishga harakat qildik.

Ishonchim komilki, "Humo arena" yuksak malakali sportchilarni tayyorlash va O`zbekistonda yirik xalqaro musobaqalar tashkil etish va eng asosiysi - yoshlarimizni qishki sport turlariga keng jalb etishga xizmat qiladi.

Bunday majmua va markazlarni biz kelgusida yurtimizning boshqa hududlarida ham barpo etamiz.

Shu munosabat bilan bugungi tadbirda ishtirok etayotgan hurmatli mehmonlarimiz - mashhur sportchi va murabbiylar - dunyo sporti yulduzlariga murojaat qilib, aytmoqchiman: biz sizning qo`llab-quvvatlashingiz, bilim va mahoratingiz, ulkan professional tajribangizga ishonamiz.

Qadrli do`stlar!

Bizning poytaxtimizga uzukka ko`z qo`ygandek yarashib turgan, sizlarning ishtirokingizda foydalanishga topshirilayotgan bu zamonaviy sport saroyi ushbu yo`nalishdagi ishlarning dastlabki amaliy natijasidir.

To`liq ishonch bilan aytish mumkinki, barcha xalqaro talablarga javob beradigan ushbu noyob kompleks sportni sevadigan xalqimiz, ayniqsa, yoshlarimiz qalbidagi orzuning amaliy ifodasi bo`ldi.

Ana shu orzuni haqiqatga aylantirgan, qisqa muddatda shunday ulugʻvor majmuani barpo etgan loyihachi, me`mor, quruvchi, va muhandislarga, chet ellik mutaxassislarga, bu ezgu ishga hissa qo`shgan barcha insonlarga chuqur minnatdorlik bildirishga ijozat bergaysiz.

Hech shubhasiz, bugungi kun milliy sportimiz tarixida yorqin sahifa bo`lib qoladi.

Butun ko`p millatli xalqimizni, ushbu tadbirimizning barcha ishtirokchilari va mehmonlarini bugungi tarixiy voqea - "Humo arena" sport saroyining ochilishi bilan chin qalbimdan tabriklayman.

Barchangizga tinchlik-omonlik, ulkan zafarlar va yangidan-yangi muvaffaqiyatlar tilayman.

E`tiboringiz uchun katta rahmat. (UzА)

"O‘qituvchi" nashriyot-matbaa ijodiy uyi ("O‘qituvchi" NMIU) umumta`lim maktablari, oliy o`quv yurtlari, akademik litsey va kasb-hunar kollejlari uchun original, tarjima darsliklar, o`quv qo`llanmalar, shuningdek, o`qituvchilar uchun metodik qo`llanmalar nashr etadi. Buyurtma

Batafsil ma`lumot

O`zbekiston Respublikasi Prezidenti Shavkat Mirziyoyevning ko`p tarmoqli Humo arena sport kompleksining tantanali ochilish marosimidagi nutqi

Yangiliklarni o‘qishni tavsiya etamiz

O`zbekiston Respublikasi Prezidenti Shavkat Mirziyoyevning Xalqaro xotin-qizlar kuniga bag`ishlab o`tkazilgan tantanali marosimdagi nutqi

O`zbekiston Respublikasi Prezidenti Shavkat Mirziyoyevning Xalqaro xotin-qizlar kuniga bag`ishlab o`tkazilgan tantanali marosimdagi nutqi...

Navro`z

Sizlarni "O`qituvchi" NMIU jamoasi nomidan yurtimiz uchun yangilanish fasli Navro`zi...

Mashhur yangiliklar