Yangilangan sana: 2017-11-24 Ko`rilgan: 86

Hamkorlikning yangi istiqbollarini belgilab bergan tarixiy tashrif

Avval xabar qilinganidek, O`zbekiston Respublikasi Prezidenti Shavkat Mirziyoyev Koreya Respublikasi Prezidenti Mun Chje Inning taklifiga binoan 22-24-noyabr kunlari davlat tashrifi bilan ushbu mamlakatda bo`ldi.

Prezidentimiz Shavkat Mirziyoyevning Koreya Respublikasiga davlat tashrifi har tomonlama samarali bo`ldi. Uchrashuvlarda yirik investitsiyaviy loyihalarni moliyalashtirish, iqtisodiyot, energetika, moliya, sarmoya, yuqori texnologiyalar kabi sohalardagi hamkorlikni yanada faollashtirish, o`zaro tovar ayirboshlash hajmini oshirish, gumanitar aloqalarni kengaytirish, vazirliklar va idoralararo hamkorlikni mustahkamlashga doir masalalar muhokama qilindi.

Tashrif doirasida savdo-iqtisodiy, investitsiyaviy, moliyaviy-texnikaviy va boshqa sohalarga oid umumiy qiymati 10 milliard AQSH dollaridan ortiq 60 dan ziyod hujjat imzolandi. Shundan 4,5 milliard dollari to`g`ridan-to`g`ri investitsiyalardir.

Erishilgan kelishuvlar va imzolangan hujjatlar O`zbekiston Respublikasi bilan Koreya Respublikasi o`rtasidagi strategik sheriklik munosabatlarini yanada rivojlantirish, mamlakatlarimiz va xalqlarimiz farovonligini yuksaltirishga xizmat qiladi.

O`zbekistonning tashabbuslari Markaziy Osiyoni barqaror va yuksak iqtisodiy rivojlangan mintaqaga aylantirishda muhim qadam bo`lishi ta`kidlandi.

O`zbekiston Respublikasi Prezidenti Shavkat Mirziyoyev Koreya Respublikasi Milliy Assambleyasi Spikeri Chon Se Gyun bilan uchrashdi.

Spiker davlatimiz rahbarini samimiy qutlar ekan, Janubiy Koreya va O`zbekiston o`rtasidagi do`stlik va strategik munosabatlarni yanada mustahkamlash keng ko`lamli hamkorlikni rivojlantirishda muhim o`rin tutishini ta`kidladi.

Joriy yil 26-sentabr kuni Toshkentda bo`lib o`tgan muzokaralarda parlamentlararo hamkorlikni rivojlantirish, mazkur yo‘nalishdagi aloqalarni yanada kengaytirish borasida muhim kelishuvlarga erishilgan edi. O`sha uchrashuvning mantiqiy davomi bo`lgan bugungi muzokaralar o`zaro ishonch va samimiy ruhda o`tdi.

Prezidentimiz Koreya Respublikasi Milliy Assambleyasi faoliyati bilan tanishdi.

Davlatimiz rahbari Shavkat Mirziyoyev Koreya Respublikasi poytaxti meriyasiga tashrif buyurdi. Prezidentimizni Seul shahri meri Pak Von Sun kutib oldi.

Shavkat Mirziyoyev faxriy mehmonlar kitobiga o`zining tilaklarini yozib qoldirdi.

Uchrashuvda O`zbekiston bilan Janubiy Koreyani do`stlik rishtalari, o`zaro manfaatli hamkorlik va strategik sheriklik munosabatlari mustahkam bog‘lab turishi alohida ta`kidlandi.

O`zbekistonda Janubiy Koreyaning yetakchi kompaniyalari va banklari ishtirokida iqtisodiyotning turli tarmoqlarida o`nlab yirik loyihalar amalga oshirilgan va oshirilmoqda. Rasmiy Seul mamlakatimizda sanoat va infratuzilmani diversifikatsiya va modernizatsiya qilishga doir ustuvor dasturlarni amalga oshirishda an`anaviy yetakchi investitsion va texnologik sherik hisoblanadi.

Davlatimiz rahbari joriy yil 3-iyul kuni Seul shahri meri Pak Von Sunni Toshkentda qabul qilib, birodarlashgan shaharlar - Toshkent va Seul o`rtasida amaliy hamkorlikni rivojlantirish masalalarini muhokama qilgan edi.

Bugungi uchrashuvda zamonaviy texnologiyalar asosida shaharni boshqarish, transport tizimi va uy-joy kommunal xo`jaligini rivojlantirish bo‘yicha samarali tizimni tashkil etish sohasida Janubiy Koreyaning ilg`or tajribasidan foydalanish masalasiga alohida e`tibor qaratildi. Shaharsozlik, me`morchilik va landshaft dizayni sohalarida o`zaro hamkorlikni faollashtirish muhimligi qayd etildi.

O`zbekiston Respublikasi Prezidenti Shavkat Mirziyoyevga Seul shahrining faxriy fuqarosi unvonini berishga bag`ishlangan marosim bo`lib o`tdi. Marosimda so`zga chiqqanlar O`zbekiston Respublikasi bilan Koreya Respublikasi o`rtasidagi hamkorlik aloqalari rivojlanib borayotgani, ikki mamlakat o`rtasidagi do`stlik munosabatlari yanada mustahkamlanishida Prezident Shavkat Mirziyoyevning davlat tashrifi muhim ahamiyat kasb etayotganini qayd etdi.

Davlatimiz rahbari xalqlarimiz o`rtasidagi do`stlik ramzi sifatida Toshkent shahridagi ko`chalardan biriga Seul nomi berish taklifini bildirdi.

Prezidentimiz Shavkat Mirziyoyevga Seul shahri faxriy fuqarosi unvoni tantanali topshirildi.

O`zbekiston Respublikasi Prezidenti Shavkat Mirziyoyev Koreya Respublikasi Bosh vaziri Li Nak Yon bilan uchrashdi.

O`zbekiston Respublikasi va Koreya Respublikasi hamkorligi so`nggi yillarda keng ko`lam kasb etdi. Davlatimiz rahbarining Janubiy Koreyaga davlat tashrifi davomida savdo, yoqilg`i-energetika, kimyo, transport va transport kommunikatsiyalari, logistika, avtomobilsozlik, tog`-kon sanoati, yengil sanoat, oziq-ovqat, qishloq xo`jaligi, axborot texnologiyalari va telekommunikatsiyalar, tibbiyot, turizm, fan-ta`lim va madaniyat kabi ko`plab sohalarda kelishuvlarga erishildi.

Prezidentimiz Shavkat Mirziyoyev Koreya Respublikasi Bosh vaziri Li Nak Yon bilan uchrashuvda erishilgan mazkur kelishuvlarni amaliyotga izchil tatbiq etish, yangi istiqbolli loyihalar bo`yicha hamkorlik aloqalarini jadallashtirish masalalarini muhokama qildi.

Suhbat chog`ida Prezident Shavkat Mirziyoyevning ushbu davlat tashrifi mamlakatlarimiz o`rtasidagi hamkorlikni yanada rivojlantirish, strategik sheriklik munosabatlarini izchil mustahkamlashga xizmat qilishi qayd etildi.

O`zbekiston Respublikasi Prezidenti Shavkat Mirziyoyev Koreya Respublikasi Prezidenti Mun Chje In hamrohligida Seul shahridagi Janubiy Koreya Milliy muzeyiga tashrif buyurdi.

Mazkur muzey Koreya Respublikasining eng yirik tarixiy va madaniy markazlaridan biri hisoblanadi. 1945 yil asos solingan muzey uchun 2005-yil o`ziga xos me`moriy yechimga ega zamonaviy bino barpo etilgan. Osiyoda eng yirik, deya e`tirof etiladigan ushbu muzey ko`lami jihatidan dunyoda oltinchi o`rinda turadi. Muzeyda 220 mingdan ortiq tarixiy, badiiy, arxeologik va boshqa eksponatlar to`plangan.

Prezidentimiz muzey eksponatlari bilan tanishdi. Madaniy-gumanitar sohalarda davlatlarimiz o`rtasidagi aloqalarni yanada kengaytirish yuzasidan kelishib olindi.

Shu bilan O`zbekiston Respublikasi Prezidenti Shavkat Mirziyoyevning Koreya Respublikasiga davlat tashrifi nihoyasiga yetdi. Ushbu tashrif siyosiy, iqtisodiy natijalari bilan mamlakatlarimiz o`rtasidagi munosabatlar tarixidan muhim o`rin egallashi va o`zaro hamkorlikni yangi bosqichga ko`tarishi muqarrar. (UzА)

"O‘qituvchi" nashriyot-matbaa ijodiy uyi ("O‘qituvchi" NMIU) umumta`lim maktablari, oliy o`quv yurtlari, akademik litsey va kasb-hunar kollejlari uchun original, tarjima darsliklar, o`quv qo`llanmalar, shuningdek, o`qituvchilar uchun metodik qo`llanmalar nashr etadi. Buyurtma

Batafsil ma`lumot

Avval xabar qilinganidek, O`zbekiston Respublikasi Prezidenti Shavkat Mirziyoyev Koreya Respublikasi Prezidenti Mun Chje Inning taklifiga binoan

Yangiliklarni o‘qishni tavsiya etamiz

Milliy iftixorimiz timsoli

1991-yil 18-noyabr kuni O`zbekiston Respublikasi Birinchi Prezidenti Islom Karimov tashabbusi bilan mamlakatimiz parlamenti tomonidan...

O`zbekiston va Rossiya iqtisodiy hamkorlik istiqbollari

O`zbekiston Respublikasida Rossiya investitsiyalari ishtirokida tuzilgan 960 dan ortiq korxona faoliyat yuritadi...

Mashhur yangiliklar

Войти / Регистрация
Закладки
Корзина покупок
Оформление заказа
Интернет-магазин книги в Ташкенте